記憶算帳

彼工我整理屜个時陣，發現一本舊个帳簿，掀開來看，看著阮爸爸、媽媽幾落十年前个開銷記錄，感覺真趣味。九月十一「百菓山賞月」車資，這是媽媽个字，彼工可能是中秋暝。九月十三訂英文雜誌一年，這是爸爸个字，伊一直攏有咧讀英語。頂面記錄个人情世事嘛真濟，不時看到啥物人結婚、啥物人生後生包外濟錢个賀禮。其中有一筆定定出現个支出，就是「肉鬆」。因為彼當陣阮猶細漢，歹嘴斗，真濟菜攏毋呷，所以媽媽才會買肉脯肉酥來予阮配飯配糜。



我看著幾落位有記阮个學費、妹妹彼當陣讀幼稚園个點心費、猶有我細漢个時學畫圖、買水彩个費用。阮厝內有五个兄弟姐妹，當初爸爸媽媽嘛猶少年，都愛擔起遮呢濟个囝仔个家庭，難免有手頭ân个時陣。所以有幾頁頂面寫个是共親情朋友借錢个帳目。看著即个部分，雖然已經是幾十年前个待誌，我嘛猶感覺真心酸。但是爸爸媽媽怹並無因為無錢，犧牲阮个教育抑是娛樂。親像有一條寫个是：「看貓兒歷險記：$18」，我臆這應該是爸爸tshūa阮去看電影个支出。閣有一條 ：「兒童科學６本：$190」，彼六本冊予我个印象足深。我猶會記得冊是青色个，硬紙板个冊皮，內面足濟足媠个彩色个圖。我都是對這六本冊當中學到「太陽系」、「三葉蟲」、「雷龍」遮个名詞。但是因為小妹猶真細漢，冊提起來毋是咬、就是共拆破，後來彼六本冊煞屍骨不存囉。



爸母个恩情大過天，所以咱應該愛有孝，我想逐家自細漢都定定得聽講，但是遐个話真遙遠、空洞。顛倒是即本帳簿予我真正體會著爸母怹彼當陣，是怎樣仔一箍銀、一箍銀來投資、一嘴一嘴飼阮呷飯、一工一工來共阮晟大漢。我感覺讀即種記錄比讀彼啥物《孝經》閣較有意義。