立春鞭春

今仔日立春，立春是開春个第一个節氣，通常佇即咧時陣，作田仔人攏差不多愛播田矣。




古早佇立春即日，地方个官員為著鼓勵大家愛打拚作穡，家已攏會親身來示範作田。就是假影夯一、兩支稻仔栽來插佇田水內。另外擱會牽一隻牛來徛佇官府頭前，縣太爺都夯一支鞭來輕輕仔共彼隻牛拍一、兩下，意思都是講：「牛兄啊，你已經歇睏歸个寒天囉，即馬開春矣，你都愛卡打拚犁田，今年收成佮會好。」後來，（我臆是因為彼隻牛真嘸聽話，拍落去伊都亂亂走），改作一隻用土佮紙糊个假牛，縣太爺嘛是意思意思共拍一下，這都是叫做「鞭春」。




張源煜版畫　土牛鞭春

今仔日，我嘛真想欲來鞭春。因為昨暝我个牛（都是我个電腦啦）竟然破病矣，沒法度開機，進前寫个物件嘛讀袂出來，予我真煩惱。想欲夯鞭來共這隻電腦牛拍一下，閣驚拍落去，這隻牛會死趬趬，按呢我猶閣卡慘，即个鞭春个儀式我只好放棄。

除了鞭春，古早人嘛講立春愛呷春餅（佮潤餅差不多）佮菜頭。我尚愛呷潤餅，但是閣幾日都欲過年矣，阮兜个冰箱已經貯佮滿滿滿。我哪是閣講欲呷潤餅，可能會予阮媽媽罵。佳哉立春猶有另外一項物件會使呷：這个時陣菜頭當「著時」，聽講立春呷菜頭卡袂破病（對啦，差一點仔袂記得，菜頭愛呷生个）。

唔，呷菜頭哪是真正有效，我都愛提菜頭來飼我彼隻憨憨个電腦牛，看覓仔伊呷了會卡骨力咧否，嘜見若貧惰都共我激死。