烘番麥

拜五尾暗仔送朋友去車頭，突然間想欲吃郵局邊仔彼攤烘番麥。真拄好，駛到位个時，攤仔邊有一个停車位，我都卡緊停落來買。即攤烘番麥，我攏感覺價錢傷貴，但是阮小弟堅持講伊个番麥比別攤个卡好吃。講實在个，怹即攤已經賣廿八冬啊，哪是無兩步七，打算嘛無可能作遮久。烘番麥是阮自細漢時陣就真愛吃个物件，但是烘番麥真貴，像阮厝裡有四，五个囝仔，吃飯挾菜都愛予媽媽來配給矣，是無啥可能會當時常來吃即種四秀仔。

讀國中个時陣，我个補習班佇即條大街个街仔尾，暗時騎腳踏車攏會經過即个烘番麥的攤仔。有tang時仔那是有風，共彼番麥的香味吹過來，我个嘴涎都會直直吞，直直吞。



烘番麥个頭家講有真濟間電視台个節目bat來訪問伊，共伊翕相，伊嘛真歡迎我共伊的相片伉佇網路上面，吃好鬥相報。





最近即幾日攏落雨，氣溫閣低，看著烘爐个炭火tshenn起來，知影即支番麥我毋免共別人「公家」，所有个香味小等咧攏是我一个人个享受，心裡真歡喜滿足。頭家倒手翻番麥，正手佇上面漆香料。烘番麥个香料應當是每一攤个秘方，哪是香料袂香，都算講烘ka油油金金媠媠，吃起來嘛是猶無及格。以早阮哪吃烘番麥，攏會一邊吃，一邊像狗仔吐舌同款吸氣閣「哈」出聲，因為香料漆了lu濟，番麥都lu辛（hiam），所以我吃烘番麥閣愛配一大甌冷滾水。

即擺買个即支番麥夯起來差不多有半斤重，香貢貢。本來我吃物件都真慢，即支番麥擱真結實，我竟然吃超過半點鐘，猶佇彼咧哺哺哺，哺ka連嘴pei都痠矣。

我看，烘番麥亦是久久仔才吃一遍都好矣。