冬節圓仔

冬至，因為寫作冬「至」，所以通常逐家將伊理解作冬天「到位矣」的意思。其實，冬天自立冬彼工開始就到位矣，佇遮的「至」代表「至極」，也就是日頭離咱北半球尚遠，寒天到冬至算是到尚顛峰的時陣，閣來日頭就會對南半球閣沓沓仔返來北爿。

我自細漢聽大人講冬至，從來毋捌懷疑過伊的漢字可能毋是即兩字。一直到幾年前，知影有人寫做「冬節」（tang-cheh），才自安呢改過來。不過，我一直猶有梟疑，因為阮兜唸出來的音實在是較像「冬祭」。到底即工是毋是唸作「冬祭」（tang-chè）雖然猶無確定，但是冬至確實是一个「冬祭」的日子，即工尚重要的是祭祖，也就是咱白話講「拜公嬤」，拜公嬤的時就愛拜圓仔。

《台灣通史》講「臺人以清明為春祭，中元為秋祭，冬至為冬祭，各祀其祖，必誠必腆。」即工拜公嬤有一个原因，因為照周朝的曆法，十一月是正月，冬至是過年，到漢朝以後雖然閣改返來以一月為正月，但是古早的冬至過年風俗一直保留落來。所以彼當時冬至愛互相慶賀，愛拜祖先、甚至愛摒掃厝內，一切和過年仝款。後來就有一句話講「冬至大如年」。遮个古早歷史雖然已經離咱真遠矣，但是咱嘛有保留其中一項。自細漢咱呷圓仔，大人就講呷冬至圓會加一歲。彼就是因為冬至是古早的過年，過年本來就愛加一歲。 

佇中國，南北的風俗攏無相仝。北爿人過年過節較時行呷麵食，像水餃、扁食彼類的。咱南方人就呷較濟米食，像糕仔、粿仔等等。冬至用秫米去挲圓仔，圓仔生做幾若款。有尚簡單的紅色、白色的細粒圓仔，煮甜湯。有人講紅的是金，白的是銀，一碗圓仔有紅有白，就若像歸碗的金銀財寶。若是客人的圓仔，平仔用細粒圓仔，但是芡油蔥、香菇、茼萵落去煮鹹湯，湯頭用料有夠澎湃。我尚愛呷的是包āⁿ的大粒鹹圓仔，煮湯的時加寒天大出的茼萵、菠菱仔，足芳足好呷。不過，即馬電視廣告的包塗豆、麻仔彼款甜āⁿ的大粒圓仔，我懷疑毋是台灣在地的冬至圓仔，可能是1949年以後才對外省傳入來的。我<span>phián冊的時有<span>phián著清朝蘇州的冬至風俗，講是包āⁿ大粒的是拜祖先用的圓仔，細粒沒āⁿ的才是拜神明用的，但是台灣若像無分佮遮爾仔清楚，雖然古早可能有分嘛無的確。

台灣以早的冬至，尚工夫的是做一款「菜包」，外口是粿皮，內面包菜脯米仔佮肉（即馬真濟人給即款食物叫做「客家菜包」其實無正確，菜包毋是干焦客家人呷爾爾）。另外嘛有人用粿粞揉作豬、雞、鴨等等精牲的模樣，才閣用紅番仔米來點色，叫做「雞母狗仔」，這是一種祝願厝裡飼的精牲會當飼佮真大隻的意思。古早例，冬至圓仔挲好，就會去門、窗、古井邊、豬椆遮个所在，逐位攏粘一粒圓仔，因為四界攏有神，門神、窗神、井神平常的年節沒人給怹拜，年尾冬節的時就敬怹一粒圓仔，算是感謝怹一年來的服務。

另外一種冬至圓仔的作用閣較趣味，冬至進前暝，圓仔挲好了後，少年媳婦會提一粒圓仔用炭火來烰，等圓仔受熱膨起來，看伊pit開的形是膨出來抑是naih落去來預測伊會生查甫抑是查某。不管是「雞母狗仔」，抑是用圓仔占生查甫抑查某，攏是向望新的一年人丁、六畜興旺。這當然佮現代人的生活無啥物關係矣，但是，若mai去想遐爾仔濟，干焦圓仔圓圓的形，就會當代表家人團圓，本身就是真好的意義。

明仔載冬至，祝逐家冬至快樂。冬至暝，你欲呷佗一種圓仔？

［華語對譯］

冬至，因為寫作冬「至」，所以通常大家將它理解成冬天「到了」的意思。其實，冬天從立冬那天開始就算到了，這裡的「至」代表「至極」，也就是太陽離北半球最遠，冬天到了冬至算是到逹最顛峰的時候，再來太陽就會從南半球再慢慢回到北邊。

我從小聽大人講冬至，從來不曾懷疑過它的漢字可能不是這兩個字。一直到幾年前，知道有人寫做「冬節」，才從此改了過來。不過，我一直還有懷疑，因為我家唸這個詞的音實在比較像「冬祭」。到底這天是不是唸成「冬祭」雖然還不確定，但是冬至確實是一個「冬祭」的日子，這天最重要的是祭祖，也就是我們白話講的「拜公嬤」，拜公嬤的時候就要拜湯圓。

《台灣通史》說「臺人以清明為春祭，中元為秋祭，冬至為冬祭，各祀其祖，必誠必腆。」這天拜公嬤有一個原因，因為照周朝的曆法，十一月是正月，冬至是過年，到漢朝以後雖然又改回來以一月為正月，但是古老的冬至過年風俗一直保留下來。所以那時冬至要互相慶賀，要拜祖先、甚至也要打掃屋裡，一切和過年相同，後來就有一句話講「冬至大如年」。這些古老的歷史雖然已經離我們很遠了，但是我們仍有保留其中一項。從小我們吃湯圓，大人就說吃冬至湯圓會多一歲，那就是因為冬至是古時候的過年，過年本來就會增加一歲。 

在中國，南北的風俗都不相同。北方人過年過節較時興吃麵食，像水餃、餛飩這類的。我們南方人就吃較多米食，像糕、粿類等等。冬至用糯米去搓湯圓，湯圓仔形狀有好幾種。有最簡單的紅色、白色的小顆湯圓，煮甜湯。有人說紅的是金，白的是銀，一碗湯圓有紅有白，就好像整碗的金銀財寶。若是客家人的湯圓，一樣用小顆湯圓，但是用油蔥、香菇爆香，右茼萵下去煮鹹湯，湯頭用料十分豐富。我最愛吃的是包餡的大顆鹹湯圓，煮湯的時候加冬天盛產的茼萵、菠菜，很香很好吃。不過，現在電視上廣告的包花生、芝麻那種甜餡的大顆湯圓，我懷疑不是台灣在地的冬至湯圓，可能是1949年以後才從外省傳進來的。我翻書時有翻到清朝蘇州的冬至風俗，說是包餡的大顆湯圓是是拜祖先用的，小顆沒餡的才是拜神明用的湯圓，但是台灣好像沒分得那麼清楚，雖然也許古時候也有分也說不定。

台灣以前的冬至，最費工夫的是做一種「菜包」，糯米粉糰裡面包蘿蔔脯和豬肉餡（現在很多人將這種食物叫做「客家菜包」其實不正確，菜包不是只有客家人吃而已）。另外也有人用粿粞捏作豬、雞、鴨等等牲畜的模樣，再用紅番仔米來染色，叫做「雞母狗仔」，這是一種祝願家裡飼養的牲畜能養得很大隻的意思。古時候的風俗，冬至湯圓搓好，就會去門、窗、古井邊、豬圈這些地方，每處都粘一顆湯圓，因為到處都有神，門神、窗神、井神平常的年節沒人祭拜他們，歲末冬至的時候就敬拜他們一顆湯圓，算是感謝他們一年來的服務。

另外一種冬至湯圓的作用更加有趣，冬至前夕，湯圓搓好了之後，少婦會拿一顆湯圓去用炭火來烤，等湯圓受熱膨脹起來，看它裂開的形狀是突出來或是凹下去來預測她會生男或是生女。不管是「雞母狗仔」，或是用湯圓仔占卜生男生女，都是冀望新的一年人丁、六畜興旺。這當然和現代人的生活沒什麼關係了，但是，如果不去想那麼多的話，光是湯圓圓圓的形狀，就可以代表家人團圓，事物圓滿，本身就是很好的意義。

明天冬至，祝大家冬至快樂！冬至夜，你要吃哪一種湯圓呢？