我的兩个阿嬤，攏佇怹九十外歲的時陣因為腳骨的問題開刀。對少年郎來講，開刀嘛是真傷的代誌，閣免講是九十外歲的老阿婆。阮外嬤生十二个後生佮查某囝，照現代的醫學觀點，就是骨質流失真濟，到老來攏愛夯枴仔走路。嘛因為行動不便，所以定定攏愛坐佇眠床。有一擺阮媽媽坐佇眠床邊給外嬤掠龍，看著伊有一隻腳皮膚較黑，閣少可仔涼涼，感覺奇怪奇怪，就較緊送病院。醫生診斷了才知影彼是「血栓」，血管去塞tiau leh，血流袂過去。佳哉發現了早，緊送去手術，若無可能會有性命危險。但是腳部的血管塞siuN久，彼隻腳已經無救矣，醫生講愛自大腿以下攏切掉。想著阿嬤受即種的艱苦，阮作子孫的，逐家嘛足毋甘。
外嬤手術了精神袂歹，但是逐家猶毋敢給伊講已經一隻腳去手術掉矣的代誌。是過一、兩工了後，外嬤家已leh挲腳的時發現的，伊驚一趒，才哭出來。阿舅才慢慢仔給伊解說。外嬤嘛無閣番、無閣哭，若像是認命仝款，干旦目箍紅紅，目屎kam tiau leh。後來伊定定會講：「活到遮呢仔久是欲創啥？亦毋較緊死死leh」。總是外嬤真韌命，閣加呷欲兩、三年才過身。到辦喪事的時，我才知影，原來手術掉彼隻腳，阿舅有給伊留落來，泡佇福馬林內面，tang好等阿嬤百年後佮伊同齊入土。
頂禮拜換阮內嬤佇後尾門仔外面跋一倒，一開始看袂出有啥乜問題，叫是休睏一時仔就好。哪知影攏無較好，等到送病院照電光，醫生講大腿骨有斷，愛手術。阮阿嬤是查某嫺仔出身，少年的時陣嘛有作穡，身體較粗勇。但是伊年紀遮呢大才第一擺入手術房，予人想著真煩惱。
我去到病院的時，阿嬤已經手術了sak出來佇病房矣。本來叫是伊一定猶昏昏仔睡，沒想著阿嬤一直se se唸，講伊去hong sak去手術房，腳手攏hong綁tiau tiau，若像倒佇石頭仔眠床仝款，冷吱吱。伊一直問護士，是安怎給伊sak入來遮，哪會攏無叫伊的後生入來參詳？我想阿嬤毋知影手術房家屬袂使綴入去的規矩，一定感覺真恐惶，真不安。雖然有給伊解說過，但是伊家已袂記得。
阿嬤有作半身麻醉，無感覺醫生leh動刀，嘛毋知影已經手術好矣。所以返來到病房，伊較緊給阮爸爸佮阿叔講：「即間病院攏偷吃步，咱去予怹諕去矣。亦無給我手術，干旦用放電的，彼錢慢且算予怹。」聽著阿嬤安呢埋怨，阮逐家攏佇邊仔偷笑。阿嬤會se se唸，閣會記得彼工是初一伊愛呷菜，表示狀況袂歹。
感謝天地保庇。
華文對譯：
我的兩個祖母都在他們九十多歲的時候因為腳骨的問題開刀。對年輕人來說，開刀是很傷的事，更別說是九十多歲的老阿婆。
我外婆生了十二個兒子女兒，照現代的醫學觀點，就是骨質流失很多，老了以後都得拿枴杖走路。也因為行動不便，所以常常都得坐在床上。有一次我媽坐在床邊幫外婆按摩，看著他有一隻腳皮膚較黑，還有點涼涼的，感覺很奇怪，就趕緊送醫院。醫生診斷後才知道那是血栓，血管堵住了，血流不過去。幸好發現得早，趕快送去手術，否則的話可能會有性命危險。但是腳部的血管塞住太久了，那隻腳已經沒救了，醫生說得從大腿以下全部切掉。想著外婆要受這種的痛苦，我們作子孫的，大家都很捨不得。
外婆手術後精神不錯，但是大家還不敢跟她講已經有一隻腳被手術掉了的事。是過一、兩天以後，外嬤自已在摸腳的時候發現的，她嚇了一跳，才哭出來。舅舅才慢慢的給伊解釋。後來外婆也沒再鬧、也沒再哭，好像認命了一樣，只是眼眶紅紅的，眼淚含在眼裡。後來她常常會說：「活到這麼久要做什麼？也不趕快死掉算了」。但是外嬤很韌命，又再多活了兩、三年才去世。到辦喪事的時候，我才知道，原來手術掉的那隻腳，舅舅有幫她留下來，泡在福馬林裡面，才好等外婆百年後和她一起入土。
上禮拜換內祖母在後門外面跌了一跤，一開始看不出有什麼問題，以為休息一陣子就好。哪知道都沒有比較好，等到送醫院照X光，醫生講大腿骨有骨折，得手術。我阿嬤是婢女出身，年輕的時候也有作莊稼，身體較粗勇。但是她年紀這麼大才第一次入手術房，讓人想著真煩惱。
我去到醫院的時候，阿嬤已經手術完推出來病房了。本來以為她一定還在昏睡，沒想到阿嬤一直碎唸，說她被推去手術房，手腳都被綁得牢牢的，又好像躺在石頭地上，冰冰涼涼的。她一直問護士，為什麼把她推到這裡來，怎麼都沒叫她的兒子們進來商量？我想阿嬤不知道手術房家屬不能跟進去的規矩，一定感覺很恐慌，很不安。雖然也有跟她解釋過，但是她自己不記得。
阿嬤有作半身麻醉，沒感覺醫生在動刀，也不知道已經手術好了。所以回到病房，她趕快告訴爸爸跟叔叔：「這間醫院都偷吃步，我們被他們諕了。［醫院］又沒給我開刀，只是用放電的，那錢［開刀費用］先別付給他們。」聽到阿嬤這樣埋怨，我們大家都在旁邊偷笑。阿嬤會碎唸，也會記得那天是初一她得吃齋，表示狀況還不錯。
感謝天地保佑。
