冬節

枝頭小太陽

今仔日是冬至，為了趕業績袂當返去厝裡團圓，歸工攏有淡薄仔稀微。
雖然佇別人看起來冬節抑無啥物鬧熱，對我來講這是一个重要的个時陣，攏會感覺應該愛作一寡特別的个儀式，來迎接這个日頭擱再倒轉來的个日子。

擱卡無閒，嘛要過冬節！想來想去，尚好是來去我彼个幸福柑子園。



相片中會當看著幸福柑子園的个色緻無真紅，本來我掠準是抑袂熟，但是阿嬸講因為進前已經共紅熟的紅柑剪四、五千斤，載去台北賣啊。貨運行的个司機哪是有出車載貨去台北，伊會注意紅柑个大賣價錢，哪是有好價，都會打電話來予阿叔，問伊欲緊剪剪咧明仔後日出一車否。





無看tio在欉紅个紅柑，我猶原是毋甘願。我問阿嬸：後一水的紅柑啥物時欲收？
阿嬸講拜一。

拜一？我嘛是愛閣上班啊，安呢欲安怎？



既然袂當閣來看紅柑，只好多歙幾張紅柑个相片。

欲轉來个時陣，阿嬸提一包茼蒿佮另外一大袋仔个紅柑、柳丁予我。
冬節哪是無呷著圓仔嘛無親像咧過節，所以我家已去款一寡材料，煮一鼎鹹圓仔，閣摻阿嬸種个茼蒿落去。煮起來个口味雖然差阮媽媽煮个差成濟，反正不管仔啦，我就是一定欲吃圓仔過冬節！







呷暗飽，我用今年年初新買的个燭台（我真甲意即个燭台，因為上面的个花樣予我想起Harry Potter），點一粒圓圓个小蠟燭盤，閣提阿嬸予我个紅柑出來剝。阿叔、阿嬸種个紅柑足甜閣足厚汁，咬一嘴落去，柑仔汁噴出來，予人強強欲tsak著，真正是止嘴乾閣袂礙胃，哈哈。

到遮，即个冬節算講是過了有完滿囉。