徛佇田中央

日頭赤炎炎的熱天，我和朋友來到淡水殼牌倉庫看良一的攝影展。偎晝的時間，自車站出來，一港燒氣對面衝過來，實在足無想欲離開有蔭的所在，行出去日頭跤。朋友佮伊的外甥仔仝齊來，十歲的囡仔，若像無塊驚日頭，歡歡喜喜就欲過街路。顛倒是阮兩个「老小姐」，雨傘夯咧，帽仔戴咧，干焦想欲較緊行入去有冷氣的所在。行到展覽的倉庫外口，看著一張宣傳的看板，畫面當中是一位坐佇田底的作穡人的尻脊骿。相片雖然是烏白的，但是我看著彼塊拄仔對土跤搝出來的一大塊薑仔，就知影邊仔的土應該是紅色的，這是八卦山台地土壤的色水。而且彼个尻脊骿，就是佇田裡毋知經過偌濟年的向腰、日頭曝、雨水淋，才會安呢看起來若像磨過的石板仝款金滑金滑。作穡人毋管天氣安怎變化，攏愛配合種作的穡頭來出門，才無像阮即款去予文明寵歹去的人，傷過貴氣，到家已有淡薄仔歹勢的程度。 

 行入去倉庫，門一開開，就鼻著稻草的芳味。「徛佇田中央」的展覽原本是計畫欲共相片囥佇割稻仔了後的田底，逐家通好行落去田中央來看相片，體會作穡人的「跤踏實地」。毋拘聯絡上無真順利，後來只好「共田搬來展覽場」。良一去訂一批稻草，摠草摠好來tshāi佇土跤。在我看起來，安呢的安排毋若是展出照片，本身嘛是一種「裝置藝術」，而且閣有教育的作用。聽講真濟囡仔看相片才知影米佇田底生作啥款，朋友的外甥仔看著彼盒粟仔，嘛用華語講：「我有看著彼有『飯』。」 

 其實我嘛仝款真愛翕佇田裡種作的作穡人。不過我歹勢共鏡頭對生份人翕相，定定是偷偷仔、遠遠仔翕。良一捌共我講過，拄著想欲翕的鏡頭、人物，毋通攏翕人的背影，應該親身去佮怹熟識，puânn-nuá 交朋友，予人歡喜甘願入你的鏡頭。我看伊展出的相片，確實攏是逐家面對鏡頭，毋是「偷翕」的。伊毋是像打獵的人看著飛鳥走獸夯槍就拍、嘛毋是像一寡仔人共作穡人當作鄉土、懷舊氣氛的代表，干焦注重畫面的情調，對畫面中的人攏無尊重，良一是真正佮對方當作熟識的朋友仝款來翕相。 

 我推薦逐家去看伊的展覽，毋是干焦因為伊是我的朋友、員林鄉親，嘛毋是干焦因為伊的相片本身（相片當然真讚！），是因為我知影翕相的人是一位疼惜土地、尊重生命、溫馴有正義感的好人。

站在田中央攝影展 展出時間：2012.8.4—2012.9.2，每日09:30-17:30，周一休館 

展出地點：淡水殼牌倉庫C棟(新北市淡水區鼻頭街22號，捷運淡水站東側後方)

 http://goo.gl/maps/aapC 

 http://blog.roodo.com/avant1997/archives/20030596.html